Ashtu siç u tha e më herët, kryebashkiaku i zgjedhur i Himarës, Fredi Beleri është zyrtarisht kandidat si eurodeputet për partinë “Demokracia e re” me kryeministrin grek Kyriakos Mitsotakis.
“Demokracia e re” shpalli listën me 42 kandidatët, ku vetëm pak minuta më parë u zyrtarizua dhe emri i Fredi Belerit.
Aktiviteti u prezantua nga Aristotelia Peloni, e cila teksa prezantonte emrin e Belerit, tha se shpreson që ai të dalë nga burgu sa më parë.
“Kandidati i radhës nuk është këtu me ne, nuk mund të flasë dhe të mbajë fjalim. Por në fakt është një kandidim me peshë të madhe, zonja dhe zotërinj është Fredi Beleri, kryebashkiaku i zgjedhur i Himarës, i cili mbahet në burgjet shqiptare. Shpresojmë që e drejta të triumfojë dhe të lihet i lirë sa më shpejt”, tha ajo.
Gjatë këtij prezantimi ka qenë i pranishëm Leonardo Beleri, vëllai i kryebashkiakut të zgjedhur të Himarës Fredi Beleri.
Teksa u tha emri i Belerit gjithë anëtarët e Demokracisë së re janë ngritur në këmbë duke duartrokitur, teksa në kor thërrisnin emrin e Belerit.
Beleri u arrestua në ambientet e një lokali në Himarë, dy ditë përpara zgjedhjeve lokale të 14 majit. Ai së bashku me bashkëpunëtorin e tij në fushatë elektorale Pandeli Kokaveshi janë dënuar nga Shkalla e Parë e GJKKO-së për veprën penale të shit-blerjes së votave.
Beleri nuk e ka marrë dot detyrën, pasi autoritetet gjyqësore nuk ia kanë mundësuar dhënien e lejes së posaçme për ta kryer betimin. Kryebashkiaku i zgjedhur i Himarës është dënuar me dy vite burg për shit-blerje votash.
