Këshilli Bashkiak i Gjirokastrës votoi në mbjedhjen e djeshme për sekretaren e re të këtij organi kolegjial. Ajo është një zonjë, Etleva Yzo, me profesion mësuese dhe përvojë pune për një kohë të gjatë në Drejtorinë Arsimore Gjirokastër. Yzo zëvendëson në këtë funksion Spartak Drasën, përfaqësues të Partisë Demokratike.
Javë më parë Argjirolajm.net ka raportuar për rastin e paprecedentë se si një funksionar i strukturave të PD-së në Gjirokastër, vijonte të qëndronte në postin e sekretarit të Këshillit Bashkiak, organ i dalë nga ato që opozita i cilëson si “zgjedhjet moniste të 30 qershorit”.
Pra, Spartak Drasa i shërbente njëkohësisht edhe Këshillit Bashkiak njëngjyrësh të socialistëve edhe strukturave të Partisë Demokratike Gjirokastër. Në fakt ky nuk është rasti i vetëm. Edhe pse PD zyrtarisht nuk i njeh deputetët që plotësuan vendet në Kuvend, duke i cilësuar shpesh edhe “kukulla të Edi Ramës”, njerëz të saj vijojnë sot të jenë në zyrat e deputetëve nëpër qarqe. Pyetja që shtrohet është kjo: Cilët deputetë përfaqësojnë këto njerëz në zyrat vendore? Deputetët që lanë Parlamentin apo ata që Tritan Shehu i etiketon si “pupacë”?!
©argjiroja.net
