Kryeministri Edi Rama zhvilloi sot pasdite një takim me rektorët dhe dekanët e universiteteve publike në vend. Ai i akuzoi ata se kanë abuzuar me autonominë që iu është dhënë nga qeveria duke shpërdoruar fondet publike. Për ta ilustruar këtë fakt, Rama solli në vëmendje të tyre vetëm shpenzimet që kryhen nga universitetet për të paguar rojet e sigurisë së godinave. Ai madje bëri ironi duke thënë se ç’nevojë kanë për roje godinat e universiteteve, çfarë sekreti fshihet brenda tyre që u dashkan kaq shumë shpenzime.
Ndërkohë ArgjiroLajm.net nga një vëzhgim i shpejt në të dhënat e thesarit zbulon shpenzimet që ka kryer Universiteti ‘Eqrem Çabej’ në Gjirokastër për ruajtjen e godinave. Në 4 vitet e fundit janë shpenzuar plot 203 milionë lekë të vjetra. Përfituesja më e madhe e këtyre parave është kompania ‘Anakonda Security’, më pas kompania ‘Grup-4’. Mesatarisht në vit ky universitet shpenzon rreth 50 milionë lekë të vjetra për rojet private. Duket se ky është një shpenzim i tepërt, ndoshta sa për të ndarë tendera dhe rrjedhimisht për të marrë ndonjë përfitim okult prej tyre.
Në kulmin e teknologjisë, fare mirë siguria fizike e universitetit mund të bëhet përmes sistemit të alarmit dhe kamerave, një investim që zgjat në kohë. Në këtë mënyrë s’ka nevojë të shpenzohen kaq shumë para. Aq më tepër që godinat universitare nuk mund të klasifikohen si të rëndësisë së veçantë. Me ndryshimet e reja pas protestës, duket se Rama do të kërkojë ndër të tjera dhe ndalimin e tendereva për roje sigurie.
©ArgjiroLajm.net
