Nga Dritan Hila
Sot kryeministri Rama ka qenë kritik me policinë e shtetit në 105 vjetorin e themelimit të saj. Në fakt mund të gjente çdo ditë tjetër nga ato të katër vjetëve të Sajes që ta bënte këtë gjë, dhe nuk kishte pse bënte prishësin e festave. Policia e shtetit ka problemet e saj ku një ndër të shumtat është edhe kriminalizimi. Prania në të e drejtorëve kokëtope dhe barkrrumbullakët që lëvizin me fuoristrada 70 mijë euro e përpjetë nuk janë një fenomen i rrallë. Me siguri askujt nuk i del t’i blejnë me rrogë. Mjafton të shikoje foton e drekës së lamtumirës së Tahirit me drejtorët e policisë në qarqe dhe nuk duhet të kishe lexuar Lombrozën për të kuptuar se nga cila anë e barrikadës ishin ata tipa.
Por ajo ka edhe heronjtë e saj të heshtur: me qindra policë të rënë në krye të detyrës ku disa të vrarë edhe nga fëmijët e droguar të njerëzve më pushtet e kurrë të dënuar; të vrarë në aksione policie; të vrarë nga depresioni dhe fukarallëku. Policia e shtetit është edhe ajo e uniformave të zbërdhylura nga dielli dhe të sëmurëve nga tymi dhe reumatizma; janë nëpunës të shtetit si çdokush tjetër. Policia sot ka problemet e saja të mëdha ku së pari fillon nga profesionalizmi. Nuk mund të kesh një të tillë nëse edhe drejtori i përgjithshëm emërohet në shkelje të ligjit të gradave. Dhe ky nuk është faji i askujt tjetër veçse i kryeministrit. Sistemi i karrierës dhe mosfunksionimi i tij është një ndër shkaqet e kësaj gjendjeje. Pastaj vazhdon me preferencat politike. Sa herë ndërrohen partitë në pushtet, në radhët e tyre bëhet reforma. Askush pas kësaj nuk ka këllqe të ndeshet me krimin, kur e di se një ditë mund të përfundosh në mes të katër rrugëve. Hashashizimi i vendit nuk ishte politikë e policisë por e qeverisë. Ndaj për këtë nuk kanë pse dënohen policët e thjeshtë. Të paktën në këtë pikë qeveria duhet të mbyllë gojën. Vettingu në polici nuk ka pse bëhet me një ligj të veçantë. Ligjet janë, mjafton të zbatohen. Nëse bëhet një ligj i ri, do të jetë që të bëjnë raprezalje të reja. Dhe së fundi, por jo se kaq janë problemet e policisë së shtetit, por se vendi nuk e lejon, rrituni rrogat policëve. Çdo marrëdhënie dypalëshe është marrëdhënie interesi. Nëse një polic paguhet mirë mund t’i kërkosh të punojë mirë. Por nëse paguhet keq nuk mund të garantosh ndershmërinë e tij. Sigurojini sistemin e karrierës, rritini rrogat, dhe do të kemi policinë që duam./dritare.net
Policia që duam dhe rroga që nuk i japim
