Festivali i 58-të në RTSH u mbyll ashtu siç kishte nisur, mes debateve të forta për cilësinë dhe kulisat. Fillimisht festivali u kritikua ashpër nga kritikët e vjetër të artit. Në shënjestër të tyre u vendos regjisorja, Vera Grabocka. Sipas tyre, ky ishte një festival pa cilësi, një tallava e muzikës me një fitues të paracaktuar. Më pas në qendër të kritikave u vendos prezantuesja, Alketa Vejsiu. Shumëkush në rrjetet sociale u ankua për delirin e saj, por edhe për faktin se tentoi të përdorte këtë skenë për qëllime politike të momentit.
Në fund fare, debati më i madh u bë për fituesen Arilena Ara me këngën ‘Shaj’. Prej kohësh ishte përfolur se fituesja do ishte Elvana Gjata me këngën ‘Me Tana’. Edhe sondazhet tregonin se Gjata do të triumfonte.
Por si përfundim, votat e dy anëtarëve shqiptare të jurisë, i dhanë fund ëndrrës së Gjatës për të prezantuar Shqipërinë në Eurovizion. Etnomuzikologia Mikaela Minga dhe poetja Rita Petro si anëtaret shqiptare të jurisë, ishin vendimtare për të përcaktuar fituesen.
Por çfarë ka ndodhur në fakt?
Që në fillim të herës pati dyshime se dyshja e famshme, Vera Grabocka-Alketa Vejsiu kishin një strategji për të nxjerrë fituese Arilena Arën. Por në garë hyri Elvana me hitin e saj, që u bë i famshëm sidomos në median sociale. Kjo lëkundi fort pozitat e Arilena Arës. Në fund fare, rezultati dihet. Ajo që nuk dihet është se çfarë roli kishte Vera Grabocka dhe Alketa Vejsiu në këtë mes. Prezantuesja Vejsiu u shfajësua përpara Elvana Gjatës, duke ia lënë si ‘dopio gjashta’ fajin në dorë Vera Grabockës. A ka një përplasje mes Verës dhe Alketës? Gazeta Panorama shkruan se më shumë ngjan si një ‘skenar përçarje’ për të dalë të lara me Elvanën.
