Ngjarja më madhështore në Hollywood, që kushton miliona dollarë dhe muaj të tërë përgatitje, pritet me padurim nga audienca më së shumti për të dëshmuar këtë madhështi, sesa për qëllimin e vërtetë të këtij eventi: vlerësimin e filmave më të mirë të vitit, bazuar në 24 kategori.
Oscar po e humbet gradualisht magjinë e tij. Në Amerikë rreth 55,3 % e qytetarëve nuk kanë parë asnjë nga nëntë filmat e nominuar për çmimin e madh. Sipas sondazhit të kryer u zbulua se elementi kryesor që shtyn audiencën të shohë një film, është kasti i aktorëve. Vetëm 14% e audiencës pranoi se nominimi për “Oscar” do t’i shtynte të shihnin një film, ndërsa 15% e saj tha se vlerësimi me çmim do të ndikonte tek vendimi i tyre për të parë një film të caktuar.
Pavarësisht rezultateve të sondazhit, nominimi për “Oscar” rrit fitimet e një filmi nëpërmjet shitjes së biletave, siç ndodhi me filmin “Spotlight”, që rriti me 140% shitjen e biletave pasi fitoi çmimin si ‘Filmi më i mirë’ një vit më parë, duke fituar 1,8 milion dollarë vetëm javën e parë pas ceremonisë.
