Rreth 10 ton lëndë narkotike e llojit marijuanë është sekuestruar në portin e Ankonës, në Itali ndërsa në pranga ka përfunduar një shqiptar.
Mediat italiane shkruajnë se lënda narkotike e ardhur nga Shqipëria është e një cilësie të lartë.
Lënda narkotike kishte destinacion pjesën veriore të Italisë. Sipas mediave droga u zbulua në një kamion të mbushur me hekur.
Sipas mediave kjo është sasia më e madhe e sekuestruar në portin e Ankonës.
Për zbulimin e lëndës narkotike u përdorën qentë e antidrogës. Sasi e drogës u zbulua rastësisht gjatë një kontrolli të dokumenteve.
Ngarkesa e deklaruar nuk korespondonte me verifikimet. Tashmë hetimet kanë nisur për të identifikuar ata që kanë ngarkuar lëndën narkotike si dhe për të identifikuar marrësit.
Mediat shkruajnë se marijuana nuk do të ndalonte në Marche por do të mbërrinte në veri të Italisë.
Të përditshmet shkruajnë se tregu është zgjeruar. Edhe klientela nuk është më e njëjta: hashashi dhe marihuana përfundojnë në duart e minorenëve .
Pas lajmit të publikuar nga mediat italiane se droga vinte nga Shqipëria, ka reaguar Policia e Shtetit duke e mohuar.
“Në lidhje me një lajm të publikuar në median online, dhe konkretisht duke ju referuar një shkrimi të publikuar në një media të shkruar në Itali, se janë sekuestruar në Ankona 10 ton Cannabis që vinte nga Shqipëria si dhe është arrestuar drejtuesi i kamionit,
Ju sqarojmë se:
Lajmi është terësisht i pavërtetë. Nuk ka asnjë komunikatë zyrtare nga autoritetet Italiane ligjzbatuese ku shprehet për sekuestrimin e kësaj sasie lënde narkotike dhe arrestimin e shtetasit shqiptar.
Policia e Shtetit ka komunikim të vazhdueshëm dhe shkëmbim informacioni në kohe reale me autoritetet policore italiane të cilat kanë konfirmuar se lajmi është i pavërtetë.
Policia e Shtetit mbetet terësisht e hapur dhe e gatshme të ofrojë informacion zyrtar për cilindo që e kërkon atë”mbyllet deklarata.
