Nuk ka një foto zyrtare të kalimit të detyrës së prefektit të Vlorës nga Flamur Mamaj te Vangjel Tavo. Prezantimi është bërë mbrëmjen e djeshme nga kryeministri Edi Rama teksa ai ishte për vizitë në Vlorë.
Ndërkohë sot ish-prefekti Flamur Mamaj ka bërë një reagim të gjatë në faqen e Prefekturës Vlorë me falenderime për bashkëpunëtorët dhe Edi Ramën.
Në fund i uron suksese edhe ish-deputetit të LSI, Vangjel Tavo. Sipas raportimeve të ndryshme në media, Flamur Mamaj e mori vesh shkarkimin dhe zëvendësimin me Vangjel Tavon pasi lajmi u publikua në media. Më poshtë reagimi i plotë i Mamajt.
Sot më shumë se kurrë, ndihem me fat që do të jem pjesë e historisë së Institucionit të Prefektit të Qarkut Vlorë.
Duke e konsideruar si nder dhe përgjegjësi të përditshme peshën specifike të pozicionit të Prefektit të Qarkut, jam përpjekur që në ditën e parë të detyrës time të mbështetem në tre vlera: integritet, besim dhe respekt.
Duhet të them se ishte një eksperiencë, në pikëpamjen njerëzore e profesionale, mjaft mbresëlënëse për mua.
Në përfundim të rrugëtimit tim për një periudhë gati 7-vjeçare, si Prefekt i Qarkut Vlorë, doja të falenderoja përzemërsisht Kryeministrin Z. Edi Rama për besimin, vlerësimin dhe mbështetjen që nga dita e parë në realizimin me integritet të detyrave dhe zbatimit korrekt të Programit të Qeverisë në Qark.
Dua të vlerësoj bashkëpunimin e ngushtë, të hapur e shumë të sinqertë me anëtarët e Këshillit të Ministrave, veçanërisht Ministrin e Brendshëm, Ministrin e Mbrojtjes, Ministrin e Turizmit, Ministrin e Bujqësisë.
Falenderoj Drejtorin e Përgjithshëm të Agjencisë Kombëtare të Mbrojtjes Civile, z. Haki Cako për mbështetjen dhe bashkëpunimin në çdo situatë emergjente të ndodhur në Qarkun Vlorë. Jam mirënjohës për bashkëpunimin e vazhdueshëm dhe frytdhënës me përfaqësuesit e Njësive të Vetëqeverisjes Vendore në Qark.
Vlerësoj gatishmërinë e treguar nga Drejtuesit e Organeve Qendrore në Nivel Vendor për mirëfunksionimin e task-forcave, komiteteve, grupeve te punës të tillë si Komiteti i Menaxhimit të Turizmit , Komiteti i Menaxhimit te Zonave të Mbrojtura, Komiteti i Ekstremizmit të Dhunshëm, Task-forca e Turizmit, Task-forca për Sigurinë,
grupi i punës për sigurinë në shkolla, si dhe atë të Luftës Kundër Kultivimit të Bimëve Narkotike.
Falenderoj për komunikimin e pandërprerë dhe shkëmbimin e eksperiencave profesionale, kolegët e mi Prefektë në Qarqet e tjera; Padyshim, falenderoj Administratën Time për ndihmën, konsulencën dhe vendimmarrjet e përbashkëta, të cilët u bënë familja ime e madhe, veçanërisht edhe Nënprefektët Sarandë dhe Delvinë ndër vite.
Falenderoj qytetarët e Qarkut të Vlorës për besimin, për të cilët Prefektura e Vlorës ka qenë gjithmonë e hapur për t’i dëgjuar dhe zgjidhur problemet sa herë që ishte e mundur; Kam një falenderim të veçantë për gjithë përfaqësuesit e medias. Jam i sigurt dhe besoj se ndajmë të njëjtin pikëpamje se kam pasur një marrëdhënie të ngushtë, të hapur, të sinqertë me secilin prej jush.
Dua të bëj publik edhe falenderimin për familjen time. Unë i falenderoj që më kanë ofruar mirëkuptimin, mbështetjen dhe inkurajimin në realizimin e detyrave të mia funksionale dhe angazhimin tim politik e publik. Së fundmi i uroj suksese në detyrën e re Prefektit të sapo emëruar Z. Vangjel Tavo! Edhe një herë faleminderit!
Flamur Mamaj