Nga Marin Mema
Dikush duhet t’u tregojë atyre që vendosin fatet e reformave se çfarë përfaqëson Libohova! Jam nip nga njëra anë e gjyshërve prej kësaj qendre të traditës dhe trashëgimisë së vyer shqiptare. Askush nuk mundet, me një të rënë të lapsit, t’i fshijë historinë dhe statusin e saj.
Duhet t’u kujtohet se çfarë përfaqësojnë Dimali dhe Këlcyra, dy qendra të lashta me rrënjë ilire, Maliqi që mbart një tjetër qytet ilir mbi kodrat e saj, Klosi me gjurmët e rëndësishme të një rezidence të Kastriotëve, Memaliaj me historitë njerëzore, Patosi, Divjaka, Prrenjasi me rrëfenjat dhe gjurmët e vjetra, Belshi që Sami Frashëri e mendonte si kryeqytet, Selenica me bitumin e nxjerrë që në kohët më të hershme, si edhe Cërriku, Rrogozhina e Fushë Arrëzi. Nuk mund të rendis gjurmët e secilës prej tyre.
Nuk mund të fshihet gjithçka me një të rënë lapsi. Aq më tepër kur përvoja ka treguar se bashkimi në njësi më të mëdha jo vetëm nuk sjell domosdoshmërisht shërbime më cilësore, por shpesh i largon ato edhe më shumë nga qytetarët.
Çfarë u prodhua me një Tiranë kaq të madhe? Sa fshatra të kryeqytetit duhet të përmendim që nuk kanë marrë kurrë investime, sepse i gjithë fokusi është përqendruar në zonat qendrore urbane? Këtyre fshatrave as u janë shtruar më shumë rrugë, as u janë hapur më shumë kanale vaditës, as kanë shërbimë më të shpejta! Paaftësia për të realizuar projekte, investime dhe vizione afatgjata nuk mund të fshihet pas reformave që rrezikojnë t’i kthejnë këto qytete në anekse të harruara. Faktet kanë treguar se reforma e 2015, nuk shkurtoi shpenzime, as prodhoi sukses, as afroi banorët me njësitë e tyre, përkundrazi!
Mos u fokusoni vetëm te pallatet dhe ndërtimet në Tiranë e në bregdet. Krijoni mundësi për investime private në industri ushqimore, agro-përpunim, pasuritë e shumta natyrore, ringjalljen e disa ndërmarrjeve, zhvillimin e bujqësisë e blegtorisë, subvencionime dhe tregje reale për prodhimin vendas. Kështu u jepet e ardhme këtyre zonave, jo duke i fshirë nga harta apo duke i bashkuar në bashki gjigante. Mos prodhoni reforma si ato që gjysmën e një fshati e përfshinte një bashki, e gjysmën një tjetër! Është fakt edhe ky!
Kjo lloj reforme nuk është zgjidhje. Është vetëm një arnim. Reforma të tilla nuk duhet të jenë partiake, as ekskluzivitet i partive, por rezultate të tryezave me ekspertë të fushave të ndryshme! Kështu realizohen reforma afatgjata! Shpendajeni sa të keni dëshirë miq! ❤️
