Kryetari i Partisë Mundësia, Agron Shehaj është takuar nga afër me fermerin nga Divjaka i cili pak ditë më parë pati një përballje me kryeministrin Edi Rama, i cili injoroi zërin e këtij qytetari në takimin e organizuar nga Ministria e Bujqësisë për skemën e mbështetjes kombëtare për vitin 2026.
“Sot erdha të takoj fermerin nga Divjaka, sepse m’u duk e papranueshme që Kryeministri i vendit nuk denjoi as ta dëgjonte njeriun e punës së ndershme dhe me arrogancë e urdhëronte: Ulu, ulu!”, shprehet Shehaj.
Gjatë takimit, fermeri i quajtur Lili ngriti zërin për shqetësimet me të cilat përballen fermerët sot në lidhje me mungesën e mbështetjes, fondeve por edhe problemit të çmimeve me të cilat vijnë në Shqipëri produktet e importit duke bërë që mallrat e fermerëve shqiptarë të mbeten stok apo të hidhen pa pasur mundësinë të dalin në treg.
“Erdha ta dëgjoj Lilin. Dhe përmes kësaj bisede, ta dëgjojnë të gjithë hallin e tij që në fakt është halli i qindra fermerëve që shohin mundin e tyre të shkojë dëm, ndërsa fondet e BE-së për bujqësinë përfundojnë te miqtë e qeverisë”, shprehet Shehaj.
Në bisedën me kreun e Partisë Mundësia, fermeri shpjegon se fondet e Bashkimit Europian 80% e tyre janë marrë nga pushtetarë dhe vetëm disa fermerë kanë përfituar prej tyre për shkak të njohjeve që mund të kenë pasur.
“– Këto IPARD e këto, kush i mbështet ato do i marrin. Nuk do i marr unë.
– S’do i marrësh ti? Pse s’do i marrësh ti?
– Jo, i thashë unë kryeministrit: shikoje listën e AZHBR-së, 80% e kanë pushtetarët.
– 80% të fondeve të IPARD-it?
– Dhe 20%, në qoftë se mund të jetë ndonjë fermer, do të jetë spondalist, “se të kam mik ty apo kam ate” spondalisht mund të jetë ndonjë fermer.
– 80% janë pushtetarë?
– Pushtetarët.
– Pushtetarët.
Ja, the ti këtë, çfarë tha Rama.
– “Ule zërin, ulu” thoshte. “Ule, ule!”
Kreu i Mundësia, Agron Shehaj e vlerësoi me respekt guximin e fermerit për t’ja thënë të vërtetën në sy kryeministrit të vendit, për shqetësimet reale me të cilat përballen sot qytetarët. Ndërsa ka bërë thirrje që të gjithë qytetarët të mos dorëzohen dhe të mos tremben nga arrogance e pushtetarëve, por të ngrenë zërin për atë që i mundon në jetën e tyre të përditshme.
“Kryeministri ka halle të tjera dhe s’ka kohë për fermerët, por ky zotëri meriton respekt. Sepse guxoi, u ngrit dhe tha të vërtetën e tij.
Këtë duhet të bëjnë të gjithë!”, thekson Shehaj.
