Dy ekipet shqiptare të futbollit të vajzave, kampionia e Vllaznisë dhe Apolonia, kanë mësuar kundërshtarët e tyre në UEFA Women’s Champions League, pas shortit të hedhur sot në selinë e UEFA-s në Nion të Zvicrës.
Kampionia e Shqipërisë, Vllaznia, do të marrë pjesë në mini-turneun 6 të raundit të dytë të kompeticionit. Skuadra shkodrane do të përballet në gjysmëfinale me fituesen e mini-turneut 5 të raundit të parë, ku bëjnë pjesë Flora (Estoni), Spartak Myjava (Sllovaki) dhe Mġarr United (Maltë).
Në ndeshjen tjetër gjysmëfinale të mini-turneut 6, Apollon Ladies (Qipro) do të luajë ndaj skuadrës fituese të mini-turneut 4, ku marrin pjesë Czarni Sosnowiec (Poloni), Athlone Town (Irlandë), WFC Nike (Gjeorgji) dhe Skopje 2014 (Maqedonia e Veriut).
Ndërkohë, Apolonia do të jetë pjesë e mini-turneut 2 dhe në gjysmëfinale do të përballet me skuadrën suedeze Hammarby, një nga ekipet më të njohura të futbollit të vajzave në Europë.
Ndeshjet gjysmëfinale të mini-turneve janë planifikuar të zhvillohen më 5 gusht, ndërsa finalet do të luhen më 8 gusht. Skuadrat fituese të secilit mini-turne do të sigurojnë kualifikimin për fazën e ardhshme të UEFA Women’s Champions League.
Pjesëmarrja e KFF Vllaznisë dhe Apolonisë në kompeticionin më prestigjioz europian për klube në futbollin e vajzave përfaqëson një tjetër hap të rëndësishëm për futbollin shqiptar, duke konfirmuar progresin dhe zhvillimin e vazhdueshëm të këtij sektori në vitet e fundit.
