Në një atmosferë plot energji rinore, u zhvillua në Tepelenë ceremonia e hapjes së fushatës së kandidatit socialist për bashkinë Gramos Sako, ku pjesëmarrja e gjerë e të rinjve, qytetarëve dhe familjarëve dha një mesazh të qartë: Tepelena po ecën përpara me besim e vazhdimësi.
Në fjalën e tij, kandidati theksoi se “kemi zgjedhur jo rastësisht që këtë fushatë ta nisim me ju, brezin e ri të Tepelenës, me ata që kanë energjinë, idetë dhe besimin se e ardhmja ndërtohet këtu, në vendlindjen tonë. Sepse kjo është koha e rinisë, koha e punës, koha e vazhdimësisë.”
Sako evidentoi se në këto vite Tepelena ka ndryshuar shumë, duke u transformuar përmes punës në infrastrukturë, arsim, ujësjellës, ndriçim dhe hapësira publike që sot janë kthyer në qendra komunitare.
“Kush ka sy për të parë e zemër për ta ndjerë, e di që puna e bërë nuk është as slogane dhe as fjalë”, u shpreh ai.
Duke iu drejtuar të rinjve, kandidati i mazhorancës tha se “duam që pas arsimimit tuaj të mirë, pas përvojave që fitoni në universitete, të ktheheni këtu, në qytetin tuaj, për të ndërtuar jetën dhe të ardhmen tuaj.”
Sako nënvizoi se programi i tij parashikon investime për rritjen e punësimit të të rinjve, sipërmarrjeve, zhvillim të turizmit dhe bujqësi të qëndrueshme.
