Kuvendi votoi sot në mbrëmje tre anëtarët e rinj të Këshillit Mbikëqyrës së Bankës së Shqipërisë. Mes tyre është edhe Suela Popa, bashkëshortja e deputetit të LSI-së në Gjirokastër, Vangjel Tavo.
Ajo mori 59 vota pro dhe 11 kundër dhe 5 abstenim. Popa ishte kandidatura që mori më shumë vota kundër. Duke qenë se votimi ishte i fshehtë, nuk dihet cilët janë deputetët e PS-së që e votuan kundër, por mendohet se së paku tre janë nga deputetët e qarkut Gjirokastër.
Bledi Çuçi, Mirela Kumbaro dhe Flamur Golemi me siguri janë mes deputetëve që nuk e mbështetën kandidaturën e Suela Popës, edhe pse ajo ishte propozim i qeverisë. Kujtojmë se Çuçi, Kumbaro dhe Golemi bënë fushatë në vitin 2017 kundër Vangjel Tavos, modelit dhe mitit të tij të rremë, si dhe goditën gjithashtu insitucionin që drejtonte bashkëshortja e tij.
Agjencia e Zhvillimit Bujqësor dhe Rural ishte një prej institucioneve totalisht në shërbim të LSI-së dhe natyrisht simbol i korrupsionit e nepotizmit. Për të përfituar subvencione fermerët dhe blegtorët e kishin të pamundur nëse s’kishin fije që i lidhnin me LSI-në apo nëse nuk jepnin ryshfet.
Të gjitha këto i denoncuan gjatë fushatës Çuçi, Kumbaro e Golemi. Ata i dhanë PS-së në Gjirokastër më shumë se 2 mijë vota shtesë krahasuar me zgjedhjet e 2013 edhe sepse goditën Vangjel Tavon, institucionin që drejtonte bashkëshortja e tij dhe krejt modelin e LSI-së.
Kësisoj këta tre deputetë me siguri ishin të parët në radhët e PS-së që kishin arsye të votonin kundër bashkëshortes së Vangjel Tavos. Edhe pse propozimi i Suela Popës nga Rama krijoi jo pak befasi, 11 votat kundër saj, më shumë se dy kandidatët e tjerë janë tregues domethënës.
Përmes votës kundër, Çuçi, Kumbaro dhe Golemi, duket se kanë dashur të ruajnë një raport të drejtë me elektoratin, aq më tepër kur në qershor do të dalin sërish para tyre për të kërkuar vota për PS-në. Por kësaj here ndoshta duke goditur sërish modelin Tavo në nivel vendor: Bashkinë Gjirokastër dhe Bashkinë Dropull, të cilat janë për fat të keq totalisht në shërbim të tij.
Nëse do duhet edhe një motiv tjetër për t’iu kundërvënë Tavos në këto zgjedhje, kujtoni pak heshtjen e tij absurde për thirrjet antishqiptare në varrimin e ekstremistit Kostandin Kacifas. “Sëpatë dhe zjarr për qentë shqiptarë”, brohorisnin grupet ekstremiste. Sot e kësaj dite Vangjel Tavo nuk është distancuar nga ato thirrje dhe as ka tentuar t’i dënojë.
©argjiroja.net
