Sërish gjyqësori po i zbardh vendimet me vonesë. Kjo ankesë vjen nga të dënuar, të cilët, duke vënë në dijeni Avokatin e Popullit, i shpjegojnë se po zvarriten pavarësisht se ligji i amnistisë 2026, për të shmangur një ngërç të tillë, përfshin edhe rastet kur vendimet nuk janë arsyetuar.
Në këtë fashë përfshihen shtetasit që ishin nën gjykim dhe u shpall vendimi ndaj tyre brenda datës 31 maj, me konsideratën se qytetari ka të drejtë të heqë dorë nga apeli kur krimi që ka kryer është mes veprave të amnistuara.
Ndërkohë, siç raporton gazetarja e Top Channel, Anila Hoxha, prokuroritë, të cilat kanë nën ndjekje penale krimet që amnistohen ose që përfaqësojnë akuzën e shtetit në gjykatë, nuk kanë kryer ende raportimet pranë Prokurorisë së Përgjithshme mbi volumin e dosjeve që mbyllen përfundimisht.
Në total, përpara se ligji të hynte në fuqi, ishte parashikuar që të mbyllen me falje gati 10 mijë hetime, kryesisht aksidente pa pasojë, drejtim mjeti në gjendje të dehur, ndërtimet pa leje dhe kundërvajtjet.
Në udhëzimin e firmosur nga Prokurori i Përgjithshëm, prokurorëve u kërkohet që të vendosin ose të pushojnë akuzat penale, ose të mos fillojnë procedimet mbi kallëzimet për veprat e ndodhura deri në datën 31 maj dhe që përfshihen nga amnistia. Bëhet fjalë për krime që parashikojnë dënim deri në tre vjet burg, me përjashtim të subjekteve që nuk përfitojnë.
Në udhëzimin e Prokurorit të Përgjithshëm u thuhet prokurorëve se çfarë hapash duhet të ndjekin. Për t’i zgjidhur në këtë rrugë, u kërkohet prokurorëve edhe mbyllja e çështjeve që përfshihen në amnisti, por që janë pezulluar më herët për shkak të mosgjetjes së autorëve.
Nuk ka një numër se sa është shifra e çështjeve që amnistohen në këtë mënyrë, por do të ndikojnë në backlog-un që ka ndikuar edhe akuzën.
Pritet që në muajin shtator, sipas këtij udhëzimi, drejtuesit e të gjitha prokurorive të informojnë Prokurorin e Përgjithshëm për numrin e shtetasve përfitues, çështjet e mosfilluara, të pushuara në hetim dhe gjatë gjykimit.
