Për ndalimin nga policia një ditë më parë të prokurorit të Gjirokastrës, Spartak Cocoli, ka reaguar ish-ministri i Drejtësisë, Ylli Manjani. Përmes një postimi në Facebook, Manjani thotë se me këtë veprim policia tregoi se “ka shkelur e përçudnuar të gjitha ligjet e këtij shteti!” Më poshtë reagimi i tij i plotë:
Policia dje, arrestoi me shumë bujë një prokuror në Gjirokastër në sallën e gjyqit. U raportua se arrestimi u bë me urdhër të Gjykatës së Krimeve të Rëna. Po dje pasdite, Prokuroria e Krimeve të Rënda njoftoi se nuk ka asnjë urdhër/vendim arresti për prokurorin.
Tani, ligjërisht Policia ose duhet të tregojë që arrestin e bëri në flagrancë, pra e zuri duke marrë bakshish aty për aty, ose ajo togë (shpurë policësh) duhet të hyjnë të gjithë në burg.
Kanë dhunuar, shkelur e përçudnuar të gjitha ligjet e këtij shteti! Ky është një rast që ndër të tjera, provon se ndryshimi i Ministrit nuk solli ndryshimin e sjelljes. Policia vijon të jetë po aq problematike në respektimin e lirive e të drejtave Kushtetuese të njeriut. Arreston e ndalon e kontrollon banesa e shemb shtëpi sipas qefit politik të Rilindjes!
Ndërkohë krimi i organizuar dhe i zakonshëm po bën kërdinë, për ditë. Më vjen keq për Sandër Lleshin që gjendet në mes të këtyre poshtërsive që vetëm policia e Enver Hoxhës i ka bërë.
