Prezenca e kryebashkiakes së Gjirokastrës Zamira Rami në takimin e llogaridhënies së kryeministrit Edi Rama i habiti të gjithë, jo më kot kjo ngjarje u pasqyrua gjerësisht në media, pasi ajo bëhet kështu e para kryebashkiake nga partitë e opozitës që merr pjesë në takimet e Ramës, ku ai flet për sukseset e qeverisë së tij. Ndërkohë që opozita ka tjetër qëndrim ndaj kreut të qeverisë. E gjetur në një situatë të tillë, Zamira Rami është detyruar sot të japë një shpjegim se përse kishte vepruar kështu.
Përmes një deklarate, ku ajo s’i kursen falenderimet për kryeministrin, Zamira Rami tenton ta kamuflojë këtë ngjarje si gjest normal në kuadër të mikpritjes gjirokastrite. Ndonëse mund të jetë edhe kështu, prezenca e saj krah Ramës ka edhe një sfond tjetër politik. Vetë Zamira Ramit i intereson një kalim në radhët e PS-së për të siguruar një rikandidim prej socialistëve në zgjedhjet e ardhshme. Nga ana tjetër, vetë Edi Ramës i intereson për diversion ndaj opozitës. Pasi në këtë mënyrë duke u shfaqur publikisht me njerëz nga radhët e saj, ai delegjitimon në një farë mënyrë akuzat që i adresohen nga LSI dhe PD. Më poshtë reagimi i plotë i kryebashkiakes Zamira Rami.
Të dashur bashkëqytetarë. Këto ditë kemi mysafir në Gjirokastër Kryeministrin e Shqipërisë dhe kabinetin e tij. Personalisht e quaj tepër të rëndësishme vëmendjen e tyre ndaj Bashkisë tonë pasi jo vetëm në kushtet e sotme, por gjithmonë, bashkëpunimi midis pushtetit qëndror dhe atij vendor, është vendimtar për zhvillimin dhe përmirësimin e jetës së komunitetit.
Personalisht kam ardhur në postin e Kryetares së Bashkisë si propozim i Lëvizjes Socialiste për Integrim dhe politikisht jam dhe do të jem pjesë e kësaj force, por mbi interesat politike unë kam marrë përsipër për të drejtuar Bashkinë, mbi interesat partiake unë kam vendosur dashurinë dhe përgjegjësinë për Gjirokastrën. Nga ana tjetër mendoj se nuk ka asgjë të keqe të përballesh me problemet e njerëzve dhe kur këtë e bëjnë bashkë, njëkohësisht të dy pushtetet nuk lënë vend për hamendje tek njerëzit, prandaj për këtë e falënderoj Kryeministrin që më ftoi të jem pjesë e panelit të llogaridhënies. Çfarë të mire do të kishte Bashkia dhe komuniteti i saj nëse unë do të sillesha ndryshe? Unë jam e qartë në veprimet e mia prandaj për të shuar të gjitha hamendjet e ngritura në disa media mbi takimet dhe të gjithë qëndrimin tim gjatë turit të Kryeministrit dhe Kabinetit Qeveritar, sqaroj se ato kanë të bëjnë, së pari me mikpritjen Gjirokastrite ku mysafiri nderohet dhe nuk i kthehen krahët dhe së dyti sepse vlerësoj se nuk ka më të rëndësishme se vëmendja e Qeverisë ndaj Gjirokastrës. Të gjitha hamendjet e tjera nuk kanë asnjë lidhje me qëndrimin tim. Ju uroj të gjithëve një ditë të mbarë!
