Në vazhdim të raportimeve për zgjedhjet lokale në bashkitë e qarkut Gjirokastër, ArgjiroLajm.net ndalet sot në Bashkinë Këlcyrë. Për socialistët duket se s’ka dilema. Kryebashkiaku aktual, Klement Ndoni, pritet të rikonfirmohet si kandidat për të marrë mandatin e tretë. Deri më tani s’ka arsye që PS të riskojë me një kandidat tjetër, prandaj zyrtarizimi i Ndonit është thjesht çështje kohe. PD nga ana tjetër ka disa aleternativa edhe pse gjasat që ta kthejë djathtas Bashkinë e Këlcyrës janë të pakta. Luan Malko, kreu aktual i PD-së në Këlcyrë mbetet një kandidaturë e mundshme.
Alternativë tjetër është Agim Damani, ish-kryetar i Komunës Ballaban. Veç tij është edhe një tjetër ish-kryetar komune i përfolur si kandidat i mundshëm, Bujar Fezga që dikur drejtonte Dishnicën. Veç tyre janë edhe dy ish drejtues të PD-së në Përmet; Arben Dosti dhe Arjan Kasaj. Ky i fundit ka drejtuar edhe Hipotekën në Përmet gjatë kohës kur PD ishte në pushtet.
Një emër tjetër që qarkullon, por me shumë pak mundësi të nominohet nga demokratët, është Adriatik Spahiu, kryetar i shoqatës ‘VATRA’ në Florida të SHBA-së. Flitet se ai ka shprehur dëshirën për të dhënë kontribut në vendlindjen e tij. Natyrisht që këto janë vetëm 6 emra të mundshëm. Në muajt e ardhshëm do të ketë shumë zhvillime dhe deomos që në skenë priten personazhe të rinj. Lobimi, pazaret dhe aleancat do të ushtrojnë ndikimin e vet derisa të zyrtarohet kandidati i demokratëve për Bashkinë Këlcyrë. Të presim!
©ArgjiroLajm.net
