Një automjet ka humbur kontrollin për arsye ende të paqarta në Sarandë mbrëmjen e sotme dhe ka goditur katër vazo dekorative që ndodheshin në anë të rrugës, duke shkaktuar dëmtimin e tyre. Mësohet se automjeti ka goditur dhe një motor të parkuar në trotuar, duke i shkaktuar dëme të konsiderueshme edhe këtij mjeti.
Nga kjo ngjarje nuk ka pasur të lënduar, megjithëse dëmet materiale janë të dukshme. Gjithashtu mësohet se sipas dëshmitarëve, automjeti është larguar nga vendngjarja menjëherë pas aksidentit, pa ndaluar për të parë dëmet e shkaktuara.
Ndërkohë, policia ka mbërritur në vendngjarje dhe ka nisur hetimet për zbardhjen e rrethanave dhe autorit, teksa do verifikojë edhe pamjet e kamerave të sigurisë.
