Sa herë vjen 5 Maji, 28-29 Nëntori apo 18 Shtatori ndodh edhe diçka tjetër e çuditshme në Gjirokastër teksa ndjek homazhet që bëhen në Varrezat e Dëshmorëve apo tek shtatorja e heroit Çerçiz Topulli. Kurorat me lule që çojnë në varreza i lenë aty disa minuta, thjesht për efekt fotosh e kamerash. Nëse shkon pak më vonë kurorat janë zhdukur. Po çfarë ndodh? Punonjësit e Bashkisë Gjirokastër, Këshillit të Qarkut apo institucioneve të tjera i heqin kurorat për t’i magazinuar sepse u duhen për herë tjetër.
Janë kurora me lule plastike që kushedi sa vjet kanë që përdoren. Zyrtarët i marrin në dorë sa për foto dhe më pas punëtorët i heqin sërish. Ne shkuam në Varrezat e Dëshmorëve pasi kishte përfunduar ceremonia dhe gjetëm vetëm një kuror të Prefektit të qarkut, Astrit Aliaj. Ishte kuror me lule natyrale, që dëshmon në fakt se prefekti e ka të vërtetë homazhin ndaj dëshmorëve. Është kujdesur që kurora të ishte me lule natyrale dhe u la aty ku e kishte vendin.
Ndërsa gjithë kurorat e tjera me lule plastike u zhdukën për në magazinë. Aq duheshin sa për të bërë foto Zamira Rami, Flamur Golemi, Armand Hila, Dasho Aliko, Krenar Kulla dhe me radhë gjithë zyrtarët e tjerë. Çfarë hipokrizie! Vetëm nderim ndaj Dëshmorëve të Atdheut nuk quhet ky, kur zyrtarët tanë s’janë në gjendje t’u lenë të rënëve në luftë as një kuror me lule. Të vetmet lule të freskëta dhe që ngelen mbi varret e dëshmorëve janë ato që u kanë sjellë familjarët e tyre, që u kanë sjell veteranët. Kurorat me lulet e zyrtarëve janë hipokrizi e gjallë. Nëse u shton edhe fjalimet e tyre bajate, shpesh copy paste, situata bëhet akoma më qesharake.
©argjiroja.net
