Tre agjentë policie dhe një qytetar janë lënduar orët e para të mëngjesit në një operacion antidrogë në Tiranë.
Sipas policisë, një i ri i identifikuar si Enea Sulejmani, ka përplasur tre efektivët që e kishin ndaluar për kontroll duke i goditur me mjetin tip VW Tiguan në përpjekje për t’u larguar për t’iu shmangur kontrollit.
Një nga efektivët ka qëlluar me armën e shërbimit duke e goditur në kofshë Sulejmanin.
Ky i fundit dhe tre efektivët janë dërguar në spitalin e Traumës ndërsa dy personat e tjerë që ndodheshin në mjetin Tiguan janë shoqëruar në polici.
Në makinë gjatë kontrollit është gjetur një pako rreth 1 kg që dyshohet se kishte brenda kokainë.
Njoftimi
“Tiranë
Sot më datë 21.03.2024, në vendin e quajtur rruga “Mihal Duri”, gjatë një operacioni policor të strukturës për Hetimin e Narkotikëve në DVP Tiranë, kanë qenë duke kryer veprime operacionale në kuadër të procedimit penal nr. 496 te vitit 2024, veprime të autorizuara nga organi i Prokurorisë Rrethit Gjyqësor Tiranë.
Gjatë momentit që stuktura operacionale ka tentuar të ndalojë automjetin tip “Volksëagen Tiguan” me ngjyrë të bardhë me targë AB 780 MP, drejtuesi i automjetit nuk i është bindur urdhrave të policisë për të ndaluar dhe ka ecur mbrapsht duke rrezikuar jetën e punonjësve të policisë dhe duke përplasur me qëllim shmangien automjetin e sherbimit të policisë.Gjatë tentativës për t’u larguar një nga punonjësit e policisë ka qëlluar me armë në drejtim të automjetit dhe për pasojë është plagosur shtetasi E. S., i cili është dërguar menjëherë në spitalin e traumës nga punonjesit e policisë dhe ndodhet nën kujdesin e mjekëve, jashtë rrezikut për jetën.
Në automjet janë konstatuar dhe dy persona të tjerë të cilët janë shoqëruar në ambientet e DVP Tiranë. Në automjet është konstatuar një pako me peshë rreth 1 kg brenda së cilës dyshohet se lende narkotike kokainë. Janë njoftuar strukturat e AMP-se të cilat do të kryejnë veprimet hetimore nën drejtimin e Prokurorisë së Juridiksionit të Përgjithshëm Tiranë për sqarimin e rrethanave të ngjarjes. AMP, pas kryerjes së veprimeve të para në vendngjarje dhe sqarimit të të gjitha rrethanave do të bëjë njoftim të plotë mbi këtë ngjarje.”
