Fredi Beleri u bë kryebashkiaku i parë shqiptar që u zgjodh nga qelia. Ai e mori mandatimin nga ana e Komisionit Qendror të Zgjedhjeve, por për shkak të masës së sigurisë arrest me burg nuk mori dot pjesë në ceremoninë formale të betimit si kryebashkiak i ri.
Megjithëse akt formal, mungesa e betimit në këshillin e ri bashkiak e pengon që të ushtrojë detyrën, që aktualisht kryhet nga Jorgo Goro, i zgjedhur që në 2019-n në krye të Himarës.
Në lidhje me mandatin e fituar më 14 maj, janë tre mundësi se si Fredi Beleri mund ta humbasë. E para është përmes një vendimi të formës së prerë të gjykatës. Në këtë rast, kjo do të kërkojë pak kohë. Vetëm sot, SPAK ka mbyllur hetimet dhe ka dërguar çështjen për Gjykim, çështje e cila do të gjykohet nga shkalla e parë e gjykatës së posaçme.
Çdo vendim i shkallës së parë mund të apelohet në shkallën e dytë të gjykatës së posaçme, si nga ana e Belerit por edhe nga ana e SPAK.
Më pas, çdo vendim i gjykatës së posaçme të Apelit mund të jetë objekt rekursi në Gjykatën e Lartë. Është kjo e fundit që jep vendimin e formës së prerë, nëse më herët këtë të drejtë nuk e ushtron gjykata e apelit të posaçëm.
Pas vendimit të Gjykatës së Lartë, Fredi Beleri humbet automatikisht mandatin dhe KQZ duhet të shpallë datën e re të zgjedhjeve të parakohshme në Himarë.
Mundësia e dytë që Beleri të humbasë mandatin është përmes shkarkimit nga ana e Qeverisë. Kjo rrugë është zgjedhur nga qeveria në rastet e kryebashkiakëve Safet Gjici, Shukri Xhelili dhe Lefter Alla. Asnjëri prej tyre nuk e kundërshtoi ligjërisht shkarkimin nga ana e qeverisë pa një vendim të formës së prerë të gjykatave.
Në rastin e Fredi Belerit, kjo ka më pak gjasa që të ndodhë, duke pasur parasysh se Fredi Beleri mund ta kundërshtojë nëse më parë nuk ka vendim gjykate të formës së prerë, si dhe reagimin e mundshëm të Greqisë për këtë rast.
Rruga e tretë që Beleri të humbasë mandatin është që të firmosë dorëheqjen pa hyrë asnjë ditë në zyrë. Një precedent i tillë është regjistruar në vitin 2019 me rastin e Valdrin Pjetrit në Shkodër.
