Pas urdhrit të ministres së Transportit dhe Energjitikës, Belinda Balluku, ARRSH ka nisur ndërprerjet e energjisë elektrike gjatë natës në disa akse rrugore të vendit. Qëllimi është që të kursehet energjia e cila përherë e më shumë shitet më shtrenjtë në tregjet ndërkombëtare për shkak edhe të konfliktit në Ukrainë.
Por cilat janë akset në Rajonin Jugor të vendit të cilat natën s’kanë ndriçim dhe për rrjedhojë drejtuesit e automjeteve duhet të bëjnë kujdes. Argjirolajm.net mëson se energjia është ndërprerë në rrugët Lin-Pogradec; Korçë-Ersekë; Bypassi Fierit; Bypassi Tepelenës; Virua-Gjirokastër dhe Ura e Gajdarit- Qafë Gjashtë. Ndërkohë Bashkia Gjirokastër në mesnatë heq ndriçimin për disa rrugë të tjera të brendshme të qytetit.
Edhe pse stakimi i dritave bëhet për të kursyer energjinë elektrike, kjo krijon vështirësi për përdoruesit e rrugëve, rrezikon gjithashtu të vështirësojë edhe punën e Policisë së Shtetit për kontrollin e territorit gjatë natës. Nuk dihet ende se deri kur do të vazhdojë kjo situatë. ©argjiroja.net