Ngrohja me kaldaja në shkollat 9-vjeçare duket se është një tjetër investim i dështuar i Bashkisë Gjirokastër. Paratë janë shpenzuar, por në klasa s’ka ngrohje. Sot Këshilli i Prindërve të shkollës ‘Urani Rumbo’, zhvilloi një takim me kreun e Agjensisë së Kujdesit dhe Mirëqënies Sociale në Bashkinë Gjirokastër, Armand Mamani, për t’i bërë me dije mungesën e ngrohjes në këtë shkollë.
Ata kishin nënshkruar gjithashtu edhe një petecion, ku kërkonin kthimin e ngrohjes përmes sobave me dru në mënyrë që procesi mësimor të vijojë normalisht. Nëse nuk ka ngrohje në shkollë, prindërit thonë se nuk do t’i lejojnë fëmijët e tyre të vijnë në mësim. Për këtë problem ata kanë vënë në dijeni edhe Drejtorinë Arsimore Rajonale.
Gjatë takimit me Këshillin e Prindërve të kësaj shkolle, Mamani ka pranuar mungesën e ngrohjes dhe ka thënë se kjo vjen për shkak të një defekti teknik. Ai shtoi më tej se është njoftuar kompania që kë instaluar kaldajat për të rregulluar defektin, duke qenë se investimi nuk është marrë ende në dorëzim. Sipas tij pritet që problemi të zgjidhet shumë shpejt. Por ky nuk është rasti i vetëm që ngrohja me kaldaja nuk ka funksionuar.
Ankesa ka patur edhe nga nxënës të shkollave të tjera në qytet. Herë shfaqet si justifikim sërish defekti teknik, herë mungesa e naftës. Pak ditë më parë Argjirolajm.net raportoi se në shkollën ‘Koti Hoxhi’, nxënësit kishin mbledhur lekë për të blerë rezistenca, duke qenë se ngrohja me kaldaja nuk funksionon.
©argjiroja.net
