Prej disa javësh Ministria e Kulturës ka prezantuar Lëvizjen Kombëtare për Lexim, një nismë e cila do të shtrihet në të gjithë vendin dhe që synon të kthejë vëmendjen e munguar ndaj librit, sidomos në radhët e fëmijëve dhe të rinjve. Duket se frymëzim prej saj ka gjetur edhe prefekti i Gjirokastrës, Astrit Aliaj. Sot ai njofton se ishte në shkollën ‘Koto Hoxhi’ bashkë me drejtoreshën e Arsimit, Lindita Rova, për të dhuruar dhe lexuar libra. Përveç frymëzimit prej LKL-së, duket se prefekti i Gjirokastrës kopjon edhe postimet në Facebook të ministres Kumbaro. Dy fjali nga postimi në Facebook i Kumbaros më 13 nëntor, kur Lëvizja Kombëtare për Lexim mbërriti në Gjirokastër, i gjen copy-paste edhe në postimin e sotëm të prefektit Astrit Aliaj. Me sa duket, ai vetë ose stafi që i bën PR, në mungesë të kreativitetit dhe etikës profesionale, s’e ka për gjë të vjedhë fjali apo shprehje sa andej-këtej.
© ArgjiroLajm.net
