Nga Kreshnik Merxhani
Bluzat e varura përfaqësojnë me mijëra emigrantë që sot kanë braktisur vendin për shkak të pamundësive e problemeve që kanë shkaktuar pushtetet 30 vjeçare. Qeveritë e partive të vjetra kanë monopolizuar në pak duar ekonominë, dhe kanë përjashtuar talentin e energjinë e vullnetin e shqiptarëve, duke i braktisur fshatrat e qytetet e duke i lënë komunitetet në mëshirë të fatit. Zërin e tyre sot, të pamundësuar prej pushteteve për t’u përfaqësuar me votë, duam ta sjellim në zemrën e qytetit të Gjirokastrës por edhe në Memaliajn e shpopulluar pothuajse krejtësisht, në Tepelenën e zbrazur, në Përmetin e mpakur dhe në Libohovë e në Dropull ku fshatra të tërë, dikur të begatë, kanë sot vetëm nga 3 apo 4 familje, e ku prej dekadash nuk dëgjohen më zërat e fëmijëve.
Varfëria në rritje dhe papunësia, korrupsioni e degradimi i institucioneve, veçanërisht i Universitetit të Gjirokastrës, ishin e janë disa nga arsyet që të rinjtë janë duke e braktisur Gjirokastrën dhe gjithë Qarkun. Sikur këto të mos mjaftonin, Qeveria filloi të zhvendosë edhe Institucionet kryesore drejt qyteteve të tjera, duke e braktisur Gjirokastrën dhe duke e shndërruar atë në periferi të harruar. Me ikjen e institucioneve, automatikisht ikën dhe shtresa e profesionistëve dhe intelektualëve duke e varfëruar qarkun jo vetëm ekonomikisht.
10.000 qytetarë nga Qarku ynë e kanë braktisur vendin brenda 4 viteve të fundit. Vetë shifrat flasin për gjendjen faktike dhe njëkohësisht shpërfaqin mungesën e interesit qeveritar për ta ndaluar një gjë të tillë. Kjo i përngjan më shumë një hemorragjie që po e drobit gjithë qarkun tonë.
Punësimet me teser partie, premtimet që dalin gënjeshtra, mungesa e investimeve apo investime në duart e oligarkëve, e shumë e shumë arsye të tjera, detyrojnë të rinjtë përmetarë, tepelenas e gjirokastritë që ta lënë vendin një orë e më parë. Por edhe pse është e vështirë, edhe pse duhet pak sakrificë, na duhet të bëhemi bashkë. Ne të pakënaqurit që jemi shumicë, duhet të protesojmë përmes votës sonë më datë 25 Prill, kundër partive të vjetra, kundër të vjetrës, për të renë.
Angazhimin e përpjekjen do ta vazhdojmë edhe pas kësaj date, deri në realizimin e aspiratave qytetare. Populli nuk po kërkon lukse, veç nevojat themelore që i duhen çdo qytetari në botë. Prandaj përpjekja jonë është nevojë e domosdoshme! Ne do të shtyjmë me forcë ligjin për votomin e emigrantëve si dhe investimet që synojnë qytetarët e jo pushtetarët. Prindër që pensionimin e kaloni në vetmi, të rinj që jetoni me mallin e atdheut e të familjes suaj, ne ju zotohemi e ju betohemi se përpjekja jonë për një Shqipëri #krejttjetër ka nisur dhe nuk do të ndalojë. Prandaj BASHKOHUNI! Gjirokastra duhet të jetë një nga kryeqendrat e Shqipërisë, dhe nuk do të lejojmë ta degradojnë, ta braktisin e ta shndërrojnë në një periferi të harruar.
