Policia në Sarandë ka gjetur të braktisur makinën e autorit të vrasjes së Eraldo Nevruzit, ngjarje e ndodhur pak pas mesnate në Dhërmi. Automjeti sipas policisë është gjetur në një parking në lagjen nr.4 të Sarandës, në afërsi të Portit Detar të qytetit.
Burime për mediat bëjnë me dije se makina e braktisur është me targa angleze dhe dyshohet se i përket 43-vjeçarit Gerald Shehu i cili pas krimit fshehu trupin e Nevruzit dhe u arratis drejt Greqisë për tu arrestuar pak më vonë nga policia vendase. Shehu kishte destinacion përfundimtar Anglinë por është kapur nga policia në aeroport. Raportohet se Gerald Shehu ishte bashkëpronar në hotelin ku punonte recepsionist viktima.
Deri më tani nuk dihen ende shkaqet dhe rrethanat e plota të ngjarjes, ndërkohë paraprakisht dyshohet se ngjarja mund të ketë ndodhur për prishje të pazareve të drogës në Angli ku viktima dhe autori jetonin, ose për një konflikt të çastit pak para krimit.
Njoftimi i policisë:
Në vijim të hetimeve intensive për zbardhjen e ngjarjes së ndodhur në Dhërmi dhe shkëmbimit të informacioneve me partnerët, për lokalizimin dhe kapjen e autorit të dyshuar, ju informojmë se:
Falë një sërë informacionesh kyçe të siguruara nga strukturat e Policisë së Shtetit, për vendndodhjen e autorit të dyshuar, dhe bashkëpunimit të ngushtë me autoritetet ndërkombëtare, veçanërisht me Policinë greke, është bërë i mundur lokalizimi dhe ndalimi i shtetasit G. Sh., i cili dyshohet të jetë autor i kësaj ngjarjeje kriminale.
Po si rezultat i veprimeve hetimore, në lagjen nr.4, Sarandë, është bërë e mundur gjetja dhe sekuestrimi në cilësinë e provës materiale i automjetit tip “Audi”, i dyshuar i përdorur nga autori në këtë ngjarje.
Grupi hetimor vijon punën intensivisht, në koordinim me Prokurorinë, për gjetjen e shtetasit E. N. dhe për dokumentimin e plotë ligjor të ngjarjes.
