Përveç Roland Bejkos, që është afishuar prej fillimit si një nga zërat e fortë publikë kundër lëvizjes së Sali Berishës në Partinë Demokratike, nga Gjirokastra Lulzim Bashës duket se i ka ngelur vetëm Spartak Drasa. Së paku nga ajo që pamë sot në daljen e Gazment Bardhit me disa delegatë të PD-së një ditë para Kuvendit të 11 dhjetorit. Drasa qëndronte në selinë e PD-së bashkë me të tjerë qëndrestarë të Lulzim Bashës nëpër rrethe.
Dy vite më parë Argjirolajm.net pati raportuar për rastin e Spartak Drasës, i cili ishte mes atyre përfaqësuesve vendorë të PD-së që “legjitimuan” zgjedhjet e 30 qershorit. Ato zgjedhje që Partia Demokratike i ka quajtur si moniste. Çfarë ka ndodhur? Spartak Drasa vijonte të mbante postin e Sekretarit të Këshillit Bashkiak Gjirokastër edhe pas “zgjedhjeve moniste” të 30 qershorit. Ishim në kushtet kur një drejtues i PD-së në Gjirokastër ushtronte një funksion në Këshillin Bashkiak të dalë nga zgjedhjet e 30 qershorit.
Pra, nga njëra anë deklaronin se nuk i njihnin ato zgjedhje, nga ana tjetër merrnin pjesë në pushtetin e dalë prej atyre zgjedhjeve. Largimi i Drasës nga Këshilli Bashkiak është bërë në 20 nëntor 2019, gati 5 muaj pas zgjedhjeve lokale. Spartak Drasa nuk ishte mes 100 delegatëve, nga 150 që ka dega Gjirokastër, të cilët disa ditë më parë u pozicionuan me Kuvendin e Sali Berishës.©argjiroja.net
