Ish-kryeministri i Shqipërisë, Sali Berisha ka shënuar 300 ditët e arrestit të tij shtëpiak. Duke mbajtur një fjalim nga ballkoni i banesës, ai sulmoi kryeministrin Edi Rama dhe drejtësinë e re, duke akuzuar edhe diplomatët ndërkombëtarë për, siç i cilëson ai, “korruptim dhe përfshirje në një grusht shteti kundër opozitës shqiptare”.
I akuzuar për korrupsion pasiv në lidhje me aferën e kompleksit “Partizani”, Berisha e quajti arrestin e tij shtëpiak një “vendim të motivuar politikisht” nga qeveria dhe institucionet, duke shtuar se kjo masë synonte izolimin e tij.
Berisha gjithashtu u shpreh se përpjekjet e kundërshtarëve për ta “arkivuar në banesën e harresës” kanë dështuar, ndërsa ai vazhdon të ndjekë procesin gjyqësor, i cili pritet të vendoset më 5 nëntor, për të përcaktuar nëse çështja do kalojë në gjykim.
“Sot u bënë 300 ditë që Edi Rama urdhëroi Parlamentin dhe mercenarët e tij të Skapit, të vendosin arrestin tim në shtëpi, pa asnjë fakt, pa asnjë dokument, pa asnjë shkelje ligji, po vetëm e vetëm si kundërshtar politik që i tmerron ata dhe mafien ndërkombëtare. Mafia ndërkombëtare, diplomatë të korruptuar që bënë grushtin e shtetit kundër opozitës shqiptare, vetëm e vetëm që të gjitha pushtetet ti kishte narkodiktatori, vegël e shpifur e tyre, Edi Rama dhe që po me këtë skenar, kërkuan publikisht persekutimin e Sali Berishës sikur Shqipëria të mos ishte një vend sovran, partner, anëtar i NATO-s, por thjeshtë një vend vasal për ta trajtuar atë si një koloni”, tha Berisha.
