E shtuna është një ditë pushimi zyrtar, por jo për kandidatët për 12 Drejtoritë Vendore të Policisë dhe Komisionin e Vlerësimit, ngritur pranë PSH.
Intervistat me 42 kandidatët e kualifikuar do të kryhen ditën e shtunë, 9 nëntor, përgjatë gjithë ditës.
Ata janë njoftuar përmes email për oraret e intervistimit, çka nënkupton prezantimin e platformës personale të objektivave.
Kjo është faza e fundit në procesin e përzgjedhjes së drejtuesve vendorë të Policisë. Në fillim të javës së ardhshme, Drejtori i Përgjithshëm Ilir Proda mësohet se do të firmosë emrat fitues, në çdonjërën prej 12 qarqeve.
Për herë të parë, Policia i zgjedh Drejtorët përmes konkurrimit, bazuar në ligjin e ri. Vetë Proda u përzgjodh në një proces garues pak javë më parë.
Ndërkohë, paralelisht po ecën gara për 48 shefa Komisariati.
Dita e premte, 8 nëntor, shënon përmbylljen e afatit të aplikimit për çdo oficer që synon të marrë drejtimin e Komisariateve në mbarë vendin.
