Ministri Blendi Gonxhja ka sulmuar kolegun demokrat Flamur Noka, pas akuzave të këtij të fundit në seancën plenare. Përmes një shënimi në llogarinë e tij, Gonxhja thotë se Noka gjatë kohës që ka qenë drejtor i Entit të Banesave ka përvetësuar pesë shtëpi.
“Turp për PD që përfaqësohet nga ky model administrimi e politikani që kullufit 5 shtëpi për veten dhe barkun e vet, ndërsa i qan hallin popullit”, shkruan ministri.
Sipas tij, Flamur Noka ka marrë një shtëpi përvete në Tiranë të cilën e ka shitur vite më vonë për të marrë një tjetër shtëpi në një pallat luksoz; si dhe ka bërë me shtëpi pushimi në Sarandë familjarët e tij të ngushtë nga Kukësi, duke përfshirë dy vëllezërit, motrën dhe një kunatë.
“Për ç’moral na flet numri 2 i Partisë Demokratike, lideri Mul Noka, kur ai dhe familjarët e tij abuzuan me Entin Kombëtar të Banesave, në kohën kur qe drejtues në bordin e atij enti shtetëror që duhet të kujdesej për strehimin social?
Muli merr nga EKB shtëpi për vete, 83 m2, që e shet tre vite me vonë gjoja me 2100 Euro m2 dhe blen direkt 260 m2 me 800 Euro m2, në një pallat luksoz, ku sipas tregut vlera është mbi 4 herë më e lartë!
Por Muli, tashmë jo më i pastrehë, i jep edhe 4 shtëpi të tjera motrës, edhe dy vëllezërve, edhe nuses së vëllait, nga Enti Kombëtar i Banesave, në Sarandë! Pra Muli ovarda me fondin e strehimit social duke zgjidhur “hallin” e familjarëve të vet nga Kukësi për shtëpi pushimi në jug! Konflikt interesi, abuzim me detyrën dhe pafytyrësi totale”, shkruan Blendi Gonxhja.
